திருக்கோயில் அருட்கொடை - நிதி திரட்டும் விருந்து

சைவத் திருக்கோயில் கலை கல்வி அறவாரியத்தின் சிந்தனை ஊற்று

சைவத் திருக்கோயில் கலை கல்வி அறவாரியத்தின் நாற்றங்காலாக இருந்தது மலேசிய சைவ சமயப் பேரவை. மலேசிய சைவ சமயப் பேரவை 2011ஆம் ஆண்டில் அமைக்கப்பெற்றது. சைவ சமயத்தைத் தனிப்பெரும் சமயமாக முன்னெடுப்பதும் தமிழரின் தலைமைச் சமயமாகச் சைவம் இருந்த வரலாற்றை முன்னிறுத்திப் பொது நிலையில் இந்துக்களுக்கும் சிறப்பாகச் சைவர்க்கும் உரிய வாழ்வியலாக மீட்டெடுப்பதும் சைவப் பேரவையின் கடமை என்று உணரப்பட்டது.

சைவப் பேரவைக்குச் சைவத்தின் மீதிலான கடமையை நிறைவேற்றுவதற்கு நிலையான பெருந்திட்டம் ஒன்று வேண்டும் என்று உணரப்பட்டது. இது குறித்து முனைவர் நாகப்பன் ஐயா தமது சித்தாந்த வகுப்பு மாணவருடன் பேசிக் கருத்தறிந்தார். மாணவர் அனைவரும் சைவத் திருக்கோயிலும் சைவ சமய மேம்பாட்டுக்குக் கல்லூரியும் அமைப்பதில் கருத்தொற்றுமை உடையவராய் இருந்தனர். சைவப் பேரவை நடத்திய அனைத்துலக சைவ சமய மாநாடுகளில் திட்டம் மக்கள் மன்றத்தில் அறிவிக்கப்பட்டது.

சிவபெருமான் திருவருளும் நால்வர் பெருமக்கள் அருள்நோக்கும் துணை கொண்டு திட்டம் வடிவமைக்கப்பட்டது. பொருத்தமான இடத்தை அடையாளம் காண்பதில் ஈப்போ சைவ சித்தாந்த மாணவர் மருத்துவர் பழனியப்பன், வழக்கறிஞர் கமலநாதன் மற்றும் சிலர் உடன் இருந்தனர். ஈப்போ, தஞ்சோங்மாலிம் போன்ற இடங்களில் காணப்பட்ட இடங்கள் சிறுசிறு குறைபாடுகள் உடையதாய் இருந்தன. முயற்சி தொடர்ந்தது. கிள்ளான் சித்தாந்த வகுப்பு மாணவர் திருவாளர் ரகு, விஜயன், வழக்கறிஞர் ரவிச்சந்திரன் ஆகியோரும் நிலத்தைக் கண்டறிவதில் உடன் சேர்ந்தனர். இறுதியில் மே 4ஆம் நாள் 2017ஆம் ஆண்டு கெர்லிங் மாவட்டத்தில் பொருத்தமான இடம் கண்டறியப்பட்டுக் கையகப்படுத்தப்பட்டது.

இதற்கிடையில் சைவத் திருக்கோயில் கலை கல்வி அறவாரியம் (Yayasan Falsafah dan Institusi Saiva) என்னும் அறவாரியம் அமைக்கும் முயற்சிகள் மேற்கொள்ளப்பட்டன. நிறுவனச் செயலாளர் திருவாளர் இராமநாதன் அவர்களின் நிறுவனம் ( K. RAMANATHAN & CO) வழி அறவாரியம் அமைக்கப்பெற்றது. தொடர்புடைய அமைச்ச அங்கீகாரமும் வழங்கியுள்ளது. இன்று வரை இந்த நிறுவனமே அறவாரியத்தின் அதிகாரபூர்வ நிர்வாகப் பணிகளை மேற்கொள்வதோடு கணக்குத் தணிக்கையாளராயும் செயல்பட்டு வருகின்றது.

முனைவர் ஐயாவின் சித்தாந்த வகுப்பு மாணவர் அணியின் திருப்பணியாகவே நிலத்திற்கு வேண்டிய முழுத் தொகையும் கிடைத்தது. நிலத்திற்கு உண்டான முழுத் தொகையும் செலுத்தப்பெற்று நிலச்சான்று (பட்டா) அறவாரியத்தின் பெயரில் பதிவு செய்யப்பெற்றுள்ளது.

நிலத்தில் திருக்கோயில் மற்றும் கல்லூரி அமைக்கும் பணிகள் தொடங்கிவிட்டன. நில அளவைப் பணிகளைத் தொடர்ந்து கோலாலம்பூரில் உள்ள எச்எம்எஸ்கே (HMSK) என்னும் வடிவமைப்பு நிறுவனத்தார் திட்ட வடிவமைப்புப் பணிகளை முடித்து நகர் மேம்பாட்டாளர் பார்வைக்கு அனுப்பியுள்ளனர். திட்டம் தொடர்பான அரசுத் துறைகளின் அனுமதி பெறுவது முதலான காட்டுமானப் பணிகள் அனைத்தும் எச்எம்எஸ்கே நிறுவனத்தார் மேற்கொள்வர்.

திருக்கோயில், கல்லூரி, அரங்கம் ஆகிய மூன்று கட்டங்களில் நிறைவேறவிருக்கும் கட்டுமானப் பணிகளுக்கு கிட்டதட்ட ரிம. நாற்பது மில்லியன் (4 கோடி) செலவாகும் என மதிப்பிடப்பட்டுள்ளது. முற்றிலும் சைவ ஆகமங்களின் அடிப்படையில் அமையவிருக்கும் திருக்கோயிலும் பசுஞ்சோலையில் நவீன அமைப்பில் அமையவிருக்கும் சைவக் கலைக் கல்லூரியும் உலகின் சைவச் சிந்தனையாளர் அனைவரின் உயிர்த் துணையாகும், சைவத்தின் அழகிய மையமாகும்.

அனைத்தும் சிவபெருமானின் திருவருளாலும் நால்வர் பெருமக்களின் அருள் நோக்காலும் நிறைவேறி வருகின்றன. இந்துக்களும் சைவ அன்பரும் இத்திருப்பணி இனிதே நிறைவேறிச் சைவம் தழைக்க உதவ வேண்டும். அனைவரின் சிவகாணிக்கையும் சிறு துளி பெரு வெள்ளமாகப் பெருக வேண்டும். ‘மேன்மைகொள் சைவ நீதி விளங்குக உலகமெலாம்’!

தென்னாடுடைய சிவனே போற்றி!
எந்நாட்டவர்க்கும் இறைவா போற்றி!